ފިލިޕީސްގެ މަނިލާގައި ކުރިއަށްދާ ޔުނައިޓް ގުލޯބަލް ސަމިޓް 2026 ފެށިއްޖެ އައު

ޔުނައިޓް ޕާލިމެންޓޭރިއަންސް ނެޓްވޯކް ފޯ ގްލޯބަލް ހެލްތް އިން އިންތިޒާމުކޮށްގެން މިމަހުގެ 03 އިން 04 ގެ ނިޔަލަށް ފިލިޕީންސްގެ މެނީލާގައި ބާއްވާ "ޔުނައިޓް ގްލޯބަލް ސަމިޓް 2026" މިއަދު ފަށައިފިއެވެ.

މިއަހަރުގެ ޔުނައިޓް ގްލޯބަލް ސަމިޓްގައި ބައިވެރިވާ ދިވެހިރާއްޖޭގެ ވަފުދުގައި އިސްކޮށް ހުންނެވީ، ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާގެ ވަޒީރު ޤީލާ އަލީއެވެ.

ޔުނައިޓް ގްލޯބަލް ސަމިޓަކީ މަޖިލިސް މެންބަރުންނާއި ދުނިޔޭގެ ޞިއްޙީ ދާއިރާގެ ވެރިންގެ މެދުގައި ގުޅުން ބަދަހިކުރުމަށް ބާއްވާ ދުނިޔޭގެ އެންމެ އިސް އެއް ފޯރަމެވެ. ކެނެޑާގެ ޚާރިޖީ އަދި ތަރައްގީގެ މަސައްކަތްތަކުގެ ތެރޭގައި ހިމެނޭ ރިސާޗް ފަންޑެއް ކަމަށްވާ އިންޓަނޭޝަނަލް ޑިވެލޮޕްމަންޓް ރިސާޗް ސެންޓަރު (އައިޑީއާރުސީ) އާ ގުޅިގެން ބާއްވާ ޔުނައިޓް މިއަހަރުގެ ގްލޯބަލް ސަމިޓުގެ ފަސްވަނަ ބައްދަލުވުމުގައި އަލިއަޅުވާލާނީ "ޞިއްޙީ ފަރަގު ކުޑަކުރުން: އިންވެސްޓްކުރުމަށް ސިޔާސީ ހިތްވަރު" މި މައުޟޫއުގެ މައްޗަށެވެ. މި ސަމިޓުގައި މަޖިލިސް މެންބަރުންގެ ސަމާލުކަމަށް ގެންނާނީ މިހާރު ދިމާވެފައިވާ އެންމެ ބޮޑު އެއް ގޮންޖެހުން ކަމަށްވާ، ޞިއްޙީ ހިދުމަތްތައް ހަމަހަމަކަމާއެކު ހޯދުމުގައި ހުރި ބޮޑެތި ފަރަގުތަކުގެ މައްޗަށެވެ.

ދެމެހެއްޓެނިވި ގޮތެއްގައި ޞިއްޙީ ނިޒާމުތައް ވަރުގަދަކުރުމަށްޓަކައި، ސިޔާސީ އިސްވެރިންގެ ބައިވެރިވުމާއި އިސްނެގުން ވަރަށް މުހިންމެވެ. މި ސަމިޓުން މަޖިލިސް މެންބަރުންނަށާއި ކަންކަމުގައި ގޮތް ނިންމާ އިސްފަރާތްތަކަށް ގޮވާލަނީ، ސިޔާސީ މަސައްކަތްތަކުގައި ޞިއްޙީ ދާއިރާއަށް އިސްކަންދިނުމަށާއި، ބޭނުންވާ ވަސީލަތްތައް ހޯދައިދިނުމަށެވެ. އަދި އެއްވެސް މީހަކު ބާކީނުކޮށް، އެންމެންނަށް ހަމަހަމަކަމާއެކު ފެންވަރު ރަނގަޅު ޞިއްޙީ ޚިދުމަތް ލިބޭނެ ސިޔާސަތުތަކަށް ތާއީދުކޮށް ކުރިއެރުވުމަށެވެ. މީގެއިތުރުން، ޞިއްޙީ ދާއިރާގެ އިތުރުން އެހެން ދާއިރާތަކާ ގުޅިގެން ޞިއްޙީ ނިޒާމު ކުރިއެރުވޭނެ ގޮތްތަކާމެދު މަޝްވަރާކޮށް، މުޅި މުޖުތަމައަށް އޭގެ ސަބަބުން ކުރާނެ ފައިދާތަކާ މެދު މި ސަމިޓުގައި މަޝްވަރާކުރެވޭނެއެވެ.

މި ބައްދަލުވުމުގެ ތެރެއިން ދިވެހިރާއްޖޭގެ ވަފުދުން ފިލިޕީންސް އާއި އެކި ޖަމްޢިއްޔާތަކާ ބައްދަލުކޮށް، ރާއްޖޭގެ ޞިއްޙީ ދާއިރާ ކުރިއެރުވުމަށް ބޭނުންވާ އެހީތެރިކަން ހޯދުމާއި ގުޅުން ބަދަހިކުރުމުގެ މަޝްވަރާތައް ކުރިއަށް ގެންދިއުމަށް ވަނީ ހަމަޖެހިފައެވެ.